ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ ಪ್ರಕಾರ 2022-23ರಲ್ಲಿ ಚುನಾವಣಾ ಟ್ರಸ್ಟ್‌ಗಳಿಂದ ರಾಜಕೀಯ ಪಕ್ಷಗಳು ಸ್ವೀಕರಿಸಿದ ದೇಣಿಗೆಯಲ್ಲಿ ಶೇಕಡಾ 70ಕ್ಕಿಂತ ಹೆಚ್ಚಿನ ಹಣವನ್ನು ಬಿಜೆಪಿಯೊಂದೇ ಪಡೆದುಕೊಂಡಿದ್ದರೆ, ಶೇಕಡಾ 24ಕ್ಕಿಂತ ಹೆಚ್ಚಿನ ಮೊತ್ತವನ್ನು ಭಾರತ್ ರಾಷ್ಟ್ರ ಸಮಿತಿ ಪಡೆದುಕೊಂಡಿದೆ. ಉಳಿದೆಲ್ಲಾ ಪಕ್ಷಗಳು ಒಟ್ಟಾಗಿ ಶೇಕಡಾ 5ಕ್ಕಿಂತಲೂ ಕಡಿಮೆ ಮೊತ್ತವನ್ನು ಸ್ವೀಕರಿಸಿವೆ.
ಹೈಲೈಟ್ಸ್‌:
- 2022-23ರಲ್ಲಿ ಚುನಾವಣಾ ಟ್ರಸ್ಟ್‌ಗಳಿಂದ ಬಿಜೆಪಿಗೆ ಶೇ. 70ಕ್ಕಿಂತ ಹೆಚ್ಚಿನ ಮೊತ್ತ ದೇಣಿಗೆ
- ಎಡಿಆರ್ ವರದಿ ಪ್ರಕಾರ ಶೇ. 24ಕ್ಕಿಂತ ಹೆಚ್ಚಿನ ಮೊತ್ತವನ್ನು ಪಡೆದುಕೊಂಡಿದೆ ಬಿಆರ್ಎಸ್
- ಉಳಿದೆಲ್ಲಾ ಪಕ್ಷಗಳಿಗೆ ಒಟ್ಟಾಗಿ ಕೇವಲ ಶೇ. 5ಕ್ಕಿಂತಲೂ ಕಡಿಮೆ ಮೊತ್ತದ ದೇಣಿಗೆ
ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (ಎಡಿಆರ್) ಪ್ರಕಾರ, 2022-23ರಲ್ಲಿ ಚುನಾವಣಾ ಟ್ರಸ್ಟ್‌ಗಳಿಂದ ರಾಜಕೀಯ ಪಕ್ಷಗಳು ಸ್ವೀಕರಿಸಿದ ದೇಣಿಗೆಯಲ್ಲಿ ಶೇ. 70ಕ್ಕಿಂತ ಹೆಚ್ಚಿನ ಹಣವನ್ನು ಬಿಜೆಪಿಯೊಂದೇ ಪಡೆದುಕೊಂಡಿದೆ.
ಈ ಅವಧಿಯಲ್ಲಿ ಭಾರತ್ ರಾಷ್ಟ್ರ ಸಮಿತಿ (ಬಿಆರ್ಎಸ್) ಸುಮಾರು ಶೇ. 25ರಷ್ಟು ದೇಣಿಗೆಯನ್ನು ಸ್ವೀಕರಿಸಿದೆ ಎಂದು ಚುನಾವಣಾ ಸುಧಾರಣೆಗಳಿಗಾಗಿ ಕಾರ್ಯನಿರ್ವಹಿಸುತ್ತಿರುವ ಎನ್‌ಜಿಒ ಎಡಿಆರ್ ಹೇಳಿದೆ.
2022-23ರ ಚುನಾವಣಾ ಟ್ರಸ್ಟ್‌ಗಳಿಗೆ ದೇಣಿಗೆ ನೀಡಿರುವ ವರದಿಗಳ ವಿಶ್ಲೇಷಣೆಯ ಪ್ರಕಾರ, ಚುನಾವಣಾ ಟ್ರಸ್ಟ್‌ಗಳಿಗೆ 39 ಕಾರ್ಪೊರೇಟ್ ಮತ್ತು ಉದ್ಯಮ ಸಂಸ್ಥೆಗಳು 363 ಕೋಟಿ ರೂ.ಗೂ ಹೆಚ್ಚು ದೇಣಿಗೆ ನೀಡಿವೆ.
ಮೂವತ್ನಾಲ್ಕು ಕಾರ್ಪೊರೇಟ್ ಮತ್ತು ಉದ್ಯಮ ಸಂಸ್ಥೆಗಳು ಪ್ರುಡೆಂಟ್ ಎಲೆಕ್ಟೋರಲ್ ಟ್ರಸ್ಟ್‌ಗೆ 360 ಕೋಟಿ ರೂ., ಸಮಾಜ್ ಎಲೆಕ್ಟೋರಲ್ ಟ್ರಸ್ಟ್‌ಗೆ ಒಂದು ಕಂಪನಿ 2 ಕೋಟಿ ರೂ., ಪರಿಬರ್ತನ್ ಎಲೆಕ್ಟೋರಲ್ ಟ್ರಸ್ಟ್‌ಗೆ ಎರಡು ಕಂಪನಿಗಳು 75.50 ಲಕ್ಷ ರೂ., ಮತ್ತು ಟ್ರಯಂಫ್ ಎಲೆಕ್ಟೋರಲ್ ಟ್ರಸ್ಟ್‌ಗೆ ಎರಡು ಕಂಪನಿಗಳು 50 ಲಕ್ಷ ರೂ. ಕೊಡುಗೆ ನೀಡಿವೆ ಎಂದು ಎಡಿಆರ್ ಹೇಳಿದೆ.ಈ ಟ್ರಸ್ಟ್‌ಗಳು ಹಂಚಿಕೊಂಡ ಅಂಕಿ-ಅಂಶಗಳ ಪ್ರಕಾರ ಬಿಜೆಪಿಯು 259.08 ಕೋಟಿ ರೂ. ಅಥವಾ ಎಲ್ಲಾ ರಾಜಕೀಯ ಪಕ್ಷಗಳು ಚುನಾವಣಾ ಟ್ರಸ್ಟ್‌ಗಳಿಂದ ಪಡೆದ ಒಟ್ಟು ದೇಣಿಗೆಯಲ್ಲಿ ಶೇ. 70.69ರಷ್ಟು ದೇಣಿಗೆಯನ್ನು ಸ್ವೀಕರಿಸಿದೆ.
ಬಿಆರ್ಎಸ್ 90 ಕೋಟಿ ರೂ. ಅಥವಾ ಒಟ್ಟು ದೇಣಿಗೆಯಲ್ಲಿ ಶೇ. 24.56ರಷ್ಟನ್ನು ಪಡೆದುಕೊಂಡಿದೆ. ಇತರ ಮೂರು ರಾಜಕೀಯ ಪಕ್ಷಗಳಾದ ವೈಎಸ್ಆರ್ ಕಾಂಗ್ರೆಸ್, ಎಎಪಿ ಮತ್ತು ಕಾಂಗ್ರೆಸ್ ಒಟ್ಟಾರೆಯಾಗಿ 17.40 ಕೋಟಿ ರೂ. ಪಡೆದಿವೆ ಎಂದು ಎಡಿಆರ್ ಹೇಳಿದೆ.2021-22ರಲ್ಲಿ ಬಿಜೆಪಿಗೆ 336.50 ಕೋಟಿ ರೂ. ದೇಣಿಗೆ ನೀಡಿದ್ದ ಪ್ರುಡೆಂಟ್ ಎಲೆಕ್ಟೋರಲ್ ಟ್ರಸ್ಟ್ 2022-23ರಲ್ಲಿ 256.25 ಕೋಟಿ ರೂ. ದೇಣಿಗೆ ನೀಡಿದೆ. ಇದೇ ವೇಳೆ ಆದರೆ ಸಮಾಜ್ ಎಲೆಕ್ಟೋರಲ್ ಟ್ರಸ್ಟ್ 2022-23ರಲ್ಲಿ ಬಿಜೆಪಿಗೆ ತನ್ನ ಒಟ್ಟು ಆದಾಯದಲ್ಲಿ 1.50 ಕೋಟಿ ರೂ. ದೇಣಿಗೆ ನೀಡಿದೆ ಎಂದು ಎಡಿಆರ್ ವರದಿ ತಿಳಿಸಿದೆ.ಸಮಾಜ್ ಎಲೆಕ್ಟೋರಲ್ ಟ್ರಸ್ಟ್ ಕಾಂಗ್ರೆಸ್‌ಗೆ 50 ಲಕ್ಷ ರೂ. ದೇಣಿಗೆ ನೀಡಿದ್ದರೆ, ಪ್ರೂಡೆಂಟ್ ಎಲೆಕ್ಟೋರಲ್ ಟ್ರಸ್ಟ್ ನಾಲ್ಕು ರಾಜಕೀಯ ಪಕ್ಷಗಳಾದ ಬಿಜೆಪಿ, ಬಿಆರ್ಎಸ್, ವೈಎಸ್ಆರ್ ಕಾಂಗ್ರೆಸ್ ಮತ್ತು ಎಎಪಿಗೆ ದೇಣಿಗೆ ನೀಡಿದೆ.