केंद्रात गेल्या सात वर्षांपासून सत्तेत असलेल्या भाजपने संपत्तीच्या बाबतीतही मोठी मजल मारत इतर पक्षांना खूप मागे टाकले आहे. ताज्या अहवालानुसार भाजप हा देशातील सर्वात श्रीमंत पक्ष ठरला असून २०१९-२० या वर्षातील भाजपची घोषित संपत्ती ४ हजार ८४७ कोटींची असल्याची माहिती समोर आली आहे. भाजपनंतर या यादीत दुसऱ्या स्थानी काँग्रेस नसून मायावती यांच्या बहुजन समाज पक्षाने स्थान पटकावले आहे. ( BJP Richest Political Party )

(एडीआर) यांनी राजकीय पक्षांच्या घोषित संपत्तीचा तपशील प्रसिद्ध केला आहे. २०१९-२० या आर्थिक वर्षाचा हा तपशील आहे. यात सात राष्ट्रीय पक्ष आणि ४४ प्रादेशिक पक्षांच्या संपत्तीची आकडेवारी देण्यात आली आहे. राष्ट्रीय पक्षांचा विचार केल्यास भाजपची संपत्ती सर्वाधिक असल्याचे स्पष्ट झाले आहे. भाजपची घोषित संपत्ती ४ हजार ८४७ कोटींची असून बहुजन समाज पक्ष ६९८.३३ कोटींचा धनी आहे. तिसऱ्या स्थानी काँग्रेस असून काँग्रेसकडून ५८८.१६ कोटींच्या संपत्ती जाहीर करण्यात आली आहे. प्रादेशिक पक्षांमध्ये समाजवादी पक्ष सर्वात श्रीमंत पक्ष ठरला आहे. सपाकडे ५६३.४७ कोटी इतकी घोषित संपत्ती आहे. त्यानंतर तेलंगण राष्ट्र समितीची (टीआरएस) घोषित संपत्ती ३०१.४७ कोटी तर अण्णा द्रमुकची घोषित संपत्ती २६७.६१ कोटी इतकी आहे.

एकूण घोषित संपत्तीचा विचार केल्यास सात राष्ट्रीय पक्षांनी जाहीर केलेल्या संपत्तीचा आकडा ६,९८८.५७ कोटी रुपये इतका आहे तर प्रादेशिक पक्षांची एकूण घोषित संपत्ती २,१२९.३८ कोटी रुपये इतकी आहे. देशातील राजकीय पक्षांच्या एकूण संपत्तीचा विचार करता मोजकेच पक्ष मालामाल असल्याचेही दिसून येत आहे. प्रादेशिक पक्षांच्या एकूण संपत्तीपैकी ९५.२७ टक्के संपत्ती ही पहिल्या १० पक्षांची आहे. राष्ट्रीय पक्षांच्या बाबतीतही असेच आकडे आहेत. भाजप आणि इतर पक्षांत संपत्तीच्या बाबतीत खूप मोठं अंतर आहे. मुदत ठेवींचा विचार केल्यास तिथेही भाजपचा आकडा सर्वात जास्त आहे. भाजपचे मुदत ठेवींमध्ये ३ हजार २५३ कोटी रुपये जमा आहेत तर बसपाची ६१८.८६ कोटी इतकी मुदत ठेव आहे. प्रादेशिक पक्षांचा विचार केल्यास समाजवादी पार्टी - ४३४.२१९ कोटी, टीआरएस - २५६.०१ कोटी, अण्णा द्रमुक - २४६.९० कोटी, द्रमुक - १६२.४२५ कोटी, शिवसेना - १४८.४६ कोटी, बिजू जनता दल - ११८.४२५ कोटी अशी रक्कम मुदत ठेवींमध्ये आहे.

'या' पक्षांवर कर्जाचे ओझे!

राजकीय पक्षांच्या मालकीची जमीन, मालमत्ता, रोख रक्कम, बँकेतील शिल्लक, मुदत ठेवींमध्ये गुंतवलेली रक्कम, कर्ज असा सगळा तपशील अहवालात देण्यात आला आहे. देणी आणि कर्जांचा तपशील पाहिल्यास सात राष्ट्रीय पक्षांवर ७४.२७ कोटींचे कर्जाचे ओझे आहे. यात उधारीवर घेतलेली रक्कम ४.२६ कोटी तर अन्य रक्कम ७०.०१ कोटी इतकी आहे. काँग्रेसला ४९.५५ कोटींची देणी चुकवायची आहेत तर तृणमूल काँग्रेसला ११.३२ कोटी रुपयांची देणी चुकती करावी लागणार आहेत.