സംസ്ഥാന, പൊതു തെരഞ്ഞെടുപ്പുകളിലായി കഴിഞ്ഞ അഞ്ച് വര്‍ഷത്തിനിടെ 1.29 കോടി വോടുകളാണ് നോട (NOTA) യ്ക്ക് ലഭിച്ചതെന്ന് വോടെടുപ്പ് അവകാശ സംഘടനയായ എഡിആര്‍ അറിയിച്ചു. അസോസിയേഷന്‍ ഫോര്‍ ഡെമോക്രാറ്റിക് റിഫോംസും (ADR) ദേശീയ ഇലക്ഷനും 2018 മുതല്‍ 2022 വരെയുള്ള വിവിധ തെരഞ്ഞെടുപ്പുകളില്‍ നോട നേടിയ വോട്ടുകളുടെ എണ്ണം വിശകലനം ചെയ്തിട്ടുണ്ട്.

സംസ്ഥാന നിയമസഭാ തെരഞ്ഞെടുപ്പില്‍ നോടയ്ക്ക് ശരാശരി 64,53,652 വോടുകള്‍ (64.53 ലക്ഷം) ലഭിച്ചിട്ടുണ്ടെന്നാണ് റിപോര്‍ട്. മൊത്തത്തില്‍ നോടയ്ക്ക് 65,23,975 (1.06 ശതമാനം) വോടുകള്‍ ലഭിച്ചു. ലോക്സഭാ തെരഞ്ഞെടുപ്പിലെ നോട വോടുകളില്‍ ഏറ്റവും കൂടുതല്‍ വോടുകള്‍, അതായത് 51,660 വോടുകള്‍ ലഭിച്ചത് ബിഹാറിലെ ഗോപാല്‍ഗഞ്ച് (SC) മണ്ഡലത്തിലാണ്, ഏറ്റവും കുറവ് നോട വോടുകള്‍ ( 100) ലക്ഷദ്വീപിലാണ്.

സംസ്ഥാന അസംബ്ലി തെരഞ്ഞെടുപ്പുകളില്‍, ഏറ്റവും ഉയര്‍ന്ന വോട് ശതമാനം നോടയ്ക്ക് ലഭിച്ചത് 2020ലാണ് - 1.46 ശതമാനം (7,49,360 വോട്ടുകള്‍). ബീഹാര്‍ (7,06,252 വോടുകള്‍), ഡെല്‍ഹി (43,108 വോട്ടുകള്‍) നിയമസഭകളിലേക്കുള്ള തെരഞ്ഞെടുപ്പിലായിരുന്നു ഇത്. ഏറ്റവും കുറഞ്ഞ വോട് ശതമാനം നോട നേടിയത് 2022ലാണ്, അതായത് അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പുകളില്‍ 0.70 ശതമാനം (8, 15,430 വോടുകള്‍). ഗോവ (10,629), മണിപ്പൂര്‍ (10,349), പഞ്ചാബ് (1,10,308), ഉത്തര്‍പ്രദേശ് (6,37,304), ഉത്തരാഖണ്ഡ് (46,840) എന്നിങ്ങനെയാണ് റിപോർട് ചെയ്തത്.

2019 ലെ സംസ്ഥാന അസംബ്ലി തെരഞ്ഞെടുപ്പില്‍ മഹാരാഷ്ട്രയില്‍ ഏറ്റവും കൂടുതല്‍ വോടുകള്‍ (7,42,134) നേടിയ നോട, 2018 ലെ മിസോറാം നിയമസഭാ തെരഞ്ഞെടുപ്പില്‍ ഏറ്റവും കുറഞ്ഞ വോട്ടുകള്‍ (2,917) നേടി. 2018ലെ ഛത്തീസ്ഗഢ് സംസ്ഥാന അസംബ്ലിയില്‍ 1.98 ശതമാനം വോട് വിഹിതമാണ് നോട നേടിയത്. 2020ലെ ഡെൽഹി അസംബ്ലി തെരഞ്ഞെടുപ്പിലും 2018ലെ മിസോറാം സംസ്ഥാന നിയമസഭാ തെരഞ്ഞെടുപ്പിലും 0.46 ശതമാനം വോട് വിഹിതമാണ് നോടയ്ക്ക് ലഭിച്ചത്. മണ്ഡലത്തിന്റെ അടിസ്ഥാനത്തില്‍, മഹാരാഷ്ട്രയിലെ ലാത്തൂര്‍ റൂറല്‍ മണ്ഡലത്തില്‍ 27,500 വോടുകളും അരുണാചല്‍ പ്രദേശിലെ താലി മണ്ഡലത്തില്‍ ഒമ്പത് വോടുകളും നോടയ്ക്ക് ലഭിച്ചു.

അരുണാചല്‍ പ്രദേശിലെ ദിരാംഗ്, അലോംഗ് ഈസ്റ്റ്, യച്ചുലി, നാഗാലാന്‍ഡിലെ നോര്‍ത്തേണ്‍ അംഗമി തുടങ്ങിയ ഏതാനും മണ്ഡലങ്ങളില്‍ സ്ഥാനാർഥിക്ക് എതിരാളികള്‍ ഇല്ലാതിരുന്നതിനാല്‍ നോടയ്ക്ക് വോട് ഒന്നും ലഭിച്ചില്ല. ക്രിമിനല്‍ കേസുകളുള്ള മൂന്നോ അതിലധികമോ സ്ഥാനാര്‍ഥികള്‍ തെരഞ്ഞെടുപ്പില്‍ മത്സരിക്കുന്ന ചുവപ്പ് ജാഗ്രത മണ്ഡലങ്ങളില്‍, 2018 മുതല്‍ സംസ്ഥാന നിയമസഭാ തെരഞ്ഞെടുപ്പുകളില്‍ നോടയ്ക്ക് 26,77,616 വോടുകള്‍ (26.77 ലക്ഷം) ലഭിച്ചതായി എഡിആര്‍ അറിയിച്ചു.