2024 ஆம் ஆண்டுக்கான தேர்தலில் அரசியல் கட்சிகளின் செலவு பட்டியலை ஜனநாயக சீர்திருத்தங்களுக்கான சங்கம் (ADR) நேற்று வெளியிட்டது. இதில், ரூ.1,494 கோடியை செலவு செய்து பா.ஜ.க முதலிடம் பிடித்துள்ளது. இது 2024 மக்களவைத் தேர்தலின் போது மொத்த தேர்தல் செலவில் 44.56 சதவீதமாகும்.

பதிவுகள் பகுப்பாய்வு செய்யப்பட்ட 32 தேசிய மற்றும் பிராந்தியக் கட்சிகளில் காங்கிரஸ் ரூ.620 கோடி அல்லது மொத்த செலவில் 18.5 சதவீதத்துடன் இரண்டாவது இடத்தில் உள்ளதாக தெரிவிக்கப்பட்டுள்ளது.

இந்தக் கட்சிகள் இணைந்து, மார்ச் 16 முதல் ஜூன் 6, 2024 வரை ஆந்திரப் பிரதேசம், அருணாச்சலப் பிரதேசம், ஒடிசா மற்றும் சிக்கிமில் மக்களவை மற்றும் ஒரே நேரத்தில் நடந்த சட்டமன்றத் தேர்தல்களின் போது ரூ.3,352.81 கோடியை செலவிட்டன. இந்தச் செலவில் தேசியக் கட்சிகள் ரூ.2,204 கோடிக்கும் அதிகமாக (65.75 சதவீதம்) செலவிட்டன.

சேகரிக்கப்பட்ட மொத்த நிதியில், தேசிய கட்சிகள் ரூ.6,930.246 கோடி (93.08 சதவீதம்) வசூலித்தன, அதே நேரத்தில் பிராந்திய கட்சிகள் ரூ.515.32 கோடி (6.92 சதவீதம்) வசூலித்ததாகவும் அந்த அறிக்கையில் தெரிவிக்கப்பட்டுள்ளது.

பொதுத் தேர்தலுக்கு 90 நாட்களுக்குள்ளும், மாநிலத் தேர்தலுக்கு 75 நாட்களுக்குள்ளும் அரசியல் கட்சிகள் தேர்தல் ஆணையத்திடம் (EC) தாக்கல் செய்ய வேண்டிய கட்டாய செலவு அறிக்கைகளின் அடிப்படையில் இந்த பகுப்பாய்வு அமைந்துள்ளது.