ഡല്‍ഹി: രാജ്യത്തെ പത്ത് മുഖ്യമന്ത്രിമാരില്‍ നാലുപേരും ക്രിമിനല്‍ കേസുകള്‍ ഉള്ളവരാണെന്ന് റിപ്പോര്‍ട്ട്. അസോസിയേഷന്‍ ഫോര്‍ ഡെമോക്രാറ്റിക് റിഫോംസും നാഷണല്‍ ഇലക്ഷന്‍ വാച്ചും ചേര്‍ന്ന് പുറത്തിറക്കിയ പുതിയ റിപ്പോര്‍ട്ടിലാണ് ഈ വിവരം ഉള്ളത്.

സംസ്ഥാന നിയമസഭകളില്‍ നിന്നും കേന്ദ്രഭരണ പ്രദേശങ്ങളില്‍ നിന്നുമുള്ള നിലവിലെ 30 മുഖ്യമന്ത്രിമാരുടെ സത്യവാങ്മൂലങ്ങള്‍ പഠിച്ചുള്ള വിശകലനത്തില്‍, 12 മുഖ്യമന്ത്രിമാര്‍ (40%) ക്രിമിനല്‍ കേസുകള്‍ നേരിടുന്നുണ്ടെന്നും 10 പേര്‍ (33%) കൊലപാതകശ്രമം, തട്ടിക്കൊണ്ടുപോകല്‍, കൈക്കൂലി, ക്രിമിനല്‍ ഭീഷണി തുടങ്ങിയ ഗുരുതരമായ കുറ്റകൃത്യങ്ങളില്‍ പ്രതികളാണെന്നും കണ്ടെത്തി.

ഇതില്‍ തെലങ്കാന മുഖ്യമന്ത്രി രേവന്ത് റെഡ്ഡി 89 കേസുകളുമായി ഒന്നാം സ്ഥാനത്തും തമിഴ്നാട്ടിലെ എം.കെ. സ്റ്റാലിന്‍ 47 കേസുകളുമായി രണ്ടാം സ്ഥാനത്തും നില്‍ക്കുന്നു.

ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡുവിന് 19 കേസുകളും കര്‍ണാടക മുഖ്യമന്ത്രി സിദ്ധരാമയ്യയ്ക്ക് 13 കേസുകളും ജാര്‍ഖണ്ഡ് മുഖ്യമന്ത്രി ഹേമന്ത് സോറന് അഞ്ച് കേസുകളുമുണ്ട്. 

മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസും ഹിമാചല്‍ പ്രദേശ് മുഖ്യമന്ത്രി സുഖ്വീന്ദര്‍ സിംഗ് സുഖുവും നാല് കേസുകള്‍ വീതവും ഉണ്ട്. കേരളത്തിലെ മുഖ്യമന്ത്രി പിണറായി വിജയന് രണ്ട് കേസുകളും പഞ്ചാബിലെ ഭഗവന്ത് മന്നിന് ഒരു കേസും ഉണ്ട്.

പ്രധാനമന്ത്രി, മുഖ്യമന്ത്രിമാര്‍, മന്ത്രിമാര്‍ എന്നിവര്‍ കുറഞ്ഞത് അഞ്ച് വര്‍ഷം തടവ് ശിക്ഷ ലഭിക്കാവുന്ന കുറ്റങ്ങള്‍ക്ക് 30 ദിവസമോ അതില്‍ കൂടുതലോ കസ്റ്റഡിയില്‍ കഴിഞ്ഞാല്‍ അവരെ സ്വയമേവ നീക്കം ചെയ്യാന്‍ ആവശ്യപ്പെടുന്ന മൂന്ന് ബില്ലുകള്‍ കേന്ദ്രം അടുത്തിടെ പാര്‍ലമെന്റില്‍ അവതരിപ്പിച്ചതോടെ, രാഷ്ട്രീയമായി ഉയര്‍ന്നുവരുന്ന സമയത്താണ് ഈ കണ്ടെത്തലുകള്‍ വരുന്നത്.