આંધ્રપ્રદેશના મુખ્યમંત્રી એન ચંદ્રબાબુ નાયડુ 931 કરોડની સંપત્તિ સાથે ભારતના સૌથી ધનિક મુખ્યમંત્રી છે. બીજી તરફ પશ્ચિમ બંગાળના મુખ્યમંત્રી અને તૃણમૂલ કોંગ્રેસના નેતા મમતા બેનરજી પાસે માત્ર 15 લાખ રૂપિયાની સંપત્તિ છે, જ્યારે તમામ મુખ્યમંત્રીઓની સરેરાશ સંપત્તિ 52.59 કરોડ રૂપિયા છે.

બિન-લાભકારી અને બિન-રાજકીય સંસ્થા એસોસિએશન ફોર ડેમોક્રેટિક રિફોર્મ્સ (Association for Democratic Reforms) દ્વારા સોમવારે જારી કરાયેલા અહેવાલ મુજબ, ભારતના કુલ 31 મુખ્યમંત્રીઓ પાસે 1,630 કરોડ રૂપિયાની સંપત્તિ છે. આમાં, આંધ્રના મુખ્યમંત્રી અને કેન્દ્રમાં સત્તારૂઢ NDA ગઠબંધનના ભાગીદાર નાયડુ મોખરે છે. રિપોર્ટ અનુસાર અરુણાચલ પ્રદેશના મુખ્યમંત્રી પેમા ખાંડુ અમીર મુખ્યમંત્રીઓની યાદીમાં બીજા ક્રમે છે, જેમની પાસે 332 કરોડ રૂપિયાથી વધુની સંપત્તિ છે. કર્ણાટકના મુખ્યમંત્રી અને કોંગ્રેસ પાર્ટીના વરિષ્ઠ નેતા સિદ્ધારમૈયા પાસે લગભગ 51 કરોડ રૂપિયાની સંપત્તિ છે. સૌથી અમીર મુખ્યમંત્રીઓની યાદીમાં તેઓ ત્રીજા સ્થાને છે.

રિપોર્ટ અનુસાર, દેશના સૌથી ગરીબ મુખ્યમંત્રીઓમાં મમતા બેનર્જી ટોચ પર છે, જ્યારે જમ્મુ અને કાશ્મીરના મુખ્યમંત્રી ઓમર અબ્દુલ્લા 55 લાખ રૂપિયાની સંપત્તિ સાથે બીજા સૌથી ગરીબ મુખ્યમંત્રી છે. જ્યારે કેરળના મુખ્યમંત્રી પી વિજયન આ યાદીમાં ત્રીજા સ્થાને છે. તેમની પાસે લગભગ 1.18 કરોડ રૂપિયાની સંપત્તિ છે.

મુખ્ય પ્રધાનોની બાકીની જવાબદારીઓની વિગતો આપતા અહેવાલમાં જણાવાયું છે કે પેમા ખાંડુ પાસે સૌથી વધુ 180 કરોડ રૂપિયાની જવાબદારી છે, જ્યારે સિદ્ધારમૈયા પાસે લગભગ 23 કરોડ રૂપિયાની અને નાયડુની 10 કરોડની જવાબદારી છે.

રિપોર્ટમાં જણાવવામાં આવ્યું છે કે દેશના 31માંથી 13 મુખ્યમંત્રીઓએ તેમની વિરુદ્ધ નોંધાયેલા અપરાધિક મામલા જાહેર કર્યા છે, જ્યારે 10 વિરુદ્ધ ગંભીર અપરાધિક કેસ નોંધાયેલા છે. આ કેસોમાં હત્યાના પ્રયાસ, અપહરણ, લાંચ અને ગુનાહિત ધાકધમકી જેવા કેસોનો સમાવેશ થાય છે. ભારતમાં 31માંથી માત્ર બે મહિલા મુખ્યમંત્રી છે. જેમાં પશ્ચિમ બંગાળની મમતા બેનર્જી અને દિલ્હીની આતિશી માર્લેનાનો સમાવેશ થાય છે.