नवीन वर्षाचे काउंटडाउन सुरू झाले आहे. जगभर ३१ डिसेंबरची लोकांमध्ये उत्सुकता पाहायला मिळत असून सरत्या वर्षाच्या अखेरीस देशातील सर्वात धनवान ते सर्वात कमी श्रीमंत अशा मुख्यमंत्र्यांची यादी समोर आली आहे. असोसिएशन ऑफ डेमोक्रॅटिक रिफॉर्म्स (ADR) ने विश्लेषणानंतर हा अहवाल प्रसिद्ध केला असून या वृत्तानुसार, आंध्र प्रदेशचे मुख्यमंत्री एन चंद्राबाबू नायडू ९३१ कोटी रुपयांच्या संपत्तीसह भारतातील सर्वात श्रीमंत मुख्यमंत्री आहेत. त्यांच्यापाठोपाठ अरुणाचल प्रदेशचे मुख्यमंत्री पेमा खांडू (३३२.५७ कोटी) आणि कर्नाटकचे सिद्धरामय्या (५१.९४ कोटी) यांचा क्रमांक लागतो.
कोण आहेत देशाचे सर्वात श्रीमंत मुख्यमंत्री
आंध्र प्रदेशमध्ये श्रीमंत मुख्यमंत्री असणे काही नवीन नाही कारण याआधी माजी मुख्यमंत्री वाय. एस. जगन मोहन रेड्डी २०१९ ते २०२४ या कालावधीत ५१० कोटी रुपयांच्या मालमत्तेसह सर्वात श्रीमंत मुख्यमंत्री होते. त्याचवेळी, जगन यांच्याआधी नायडू यांनी २०१४ ते २०१९ दरम्यान सर्वात श्रीमंत मुख्यमंत्री म्हणून १७७ कोटी रुपयांची संपत्ती जाहीर केली होती.
देशातील कोणत्या मुख्यमंत्र्यांकडे सर्वाधिक संपत्ती
- चंद्राबाबू नायडू (आंध्र प्रदेश) – ९३१ कोटी रुपये
- पेमा खांडू (अरुणाचल प्रदेश)- ३३२.५७ कोटी रुपये
- सिद्धरामय्या (कर्नाटक) – ५१.९४ कोटी रुपये
- पी. विजयन (केरळ) – १.१९ कोटी रुपये
- ममता बॅनर्जी (पश्चिम बंगाल) – १५.३८ लाख रुपये
- ओमर अब्दुल्ला (जम्मू आणि काश्मीर) – ५५.२४ लाख रुपये
कोणत्या मुख्यमंत्र्यांची सर्वात कमी संपत्ती
दुसरीकडे, सर्वात कमी घोषित संपत्ती असलेल्या मुख्यमंत्र्यांमध्ये पश्चिम बंगालच्या ममता बॅनर्जी अव्वल आहे. ममता दीदींची संपत्ती १५.३८ लाख रुपये असून त्यांच्यानंतर जम्मू-काश्मीरचे ओमर अब्दुल्ला यांनी ५५.२४ लाख रुपयांची संपत्ती जाहीर केली तर, केरळचे मुख्यमंत्री पिनाराई विजयन याचना एकूण संपत्ती १.१९ कोटी रुपये आहे.
तेलंगणाच्या मुख्यमंत्र्यांवर सर्वाधिक गुन्हे
असोसिएशन फॉर डेमोक्रॅटिक रिफॉर्म्स (ADR) आणि नॅशनल इलेक्शन वॉच (NEW) यांच्या देशातील ३१ मुख्यमंत्र्यांच्या स्व-प्रतिज्ञापत्रांच्या विश्लेषणानुसार तेलंगणाचे मुख्यमंत्री ए रेवंत रेड्डी यांच्यावर सर्वाधिक सुमारे ८९ गुन्हे दाखल असून त्यापैकी ७२ गंभीर स्वरूपाचे आहेत.